SAS krevur ikki longur munnbind

Flogfeløgini SAS og Norwegian krevja ikki longur, at ferðafólk í flogførum, sum flúgva millum lond í Skandinavia, hava munnbind.

Kravið um munnbind er eisini slept í flogførum, sum flúgva innanríkis.

Broytingin er eisini galdandi fyri ferðafólk hjá SAS á rutuni millum Føroyar og Keypmannahavn. Tað váttar eitt talsfólk hjá SAS fyri útvarpinum í dag.

Atlantic umhugsar støðuna

Jóhanna á Bergi, stjóri á Atlantic Airways, sigur, at tey hava ikki hava gjørt av, um kravið um munnbind hjá ferðandi við Atlantsflogi verður sett úr gildi. Men støða verður tikin til tað í vikuni, sigur hon.

Kravið um at brúka munnbind í floghavnum  stendur við, bæði í Danmark og í Føroyum, tí trygdarfelagsskapurin fyri loftferðslu, EASA, mælir framvegis til at brúka munnbind.