Krógvaðu 7,7 mió. kr. í frystigóðsi til Grønlands

Tollmyndugleikarnir í Danmark funnu herfyri 7,7 milliónir krónur, sum vórðu krógvaðir í frystigóðsi,  ið skuldi sendast til Grønlands, skrivar TV2.

Tollvaldið hevur í dag boðað frá, at tað var miðskeiðis í oktober, at teir funnu pengarnar.

Eftirlitskanningar vórðu gjørdar av nøkrum plattum við frystivørum, sum skuldu til Grønlands. Tollskjølini vóru í lagi, og í fyrsta umfari, tá ið tollararnir hugdu at pakkunum, sá ikki út til, at nakað illgrunasamt var á vási. 

Men við hjálp frá hundum, sum eru vandir til uppgávuna, og fleiri skanningum, eydnaðist tað tollvaldinum at finna pengarnar. Teir lógu væl krógvaðir í frystigóðsinum.

Upplýst verður ikki, hvaðani pengarnir eru komnir frá.

Løgreglan í Grønlandi arbeiðir nú víðari við málinum.