800.000 kr. afturat til langhylin í Havn

Býráðið í Havn skal í kvøld viðgera eitt uppskot um at játta 800.000 kr. til uppskot og kostnaðarmeting um einfaldari takkonstruktión, brúsu- og umklæðingarrúm og bilpláss í sambandi við langhylin.

Hesi arbeiði eru ikki við í fíggingini, sum nú er.

Mett verður neyðugt at fáa hesar verkætlanir neyvari greinaðar og kostnaðarmettar, so tær kunnu verða fíggjaðar og klárar at taka í nýtslu í seinasta lagi samstundis sum langhylurin er liðugur. 

Býráðið skal í kvøld viðgera eitt uppskot um at heita á ráðgevan hjá kommununi um at gera uppskot og kostnaðarmetingar og játta 800.000 kr. til endamálið.

Betri umstøður

Býráðið vil eisini hava uppskot um, hvussu umstøðurnar og tilboðini í langhylinum til barnafamiljur kunnu betrast.

Semja er ikki í býráðnum, tí uppskotið kemur frá meirilutum í Mentamálanevndini og Fíggjarnevndini.

Minnilutin sigur seg atkvøða blankt.