Ov nógv lata seg kanna

Tað er sera umráðandi, at tey, sum ikki hava fyri neyðini at verða kannað fyri koronu, lata vera við at kanna seg.

Tað sigur Sjúkrahúsverkið í tíðindaskrivi, sum varð sent út fyri løtu síðani.

Stórt trýst er á kanningarstøðini í løtuni, og hvønn dag verða fleiri enn 3.000 fólk kannað fyri koronu. 

Smittað enda aftast í røðini

Sjúkrahúsverkið sigur í tíðindaskrivinum, at bæði Landslæknin og landsstýrismaðurin í heilsumálaráðnum vístu í farnu viku á trupulleikan at nógv, sum ikki hava sjúkutekin og heldur ikki hava serliga orsøk at halda seg vera smittað, lata seg kanna fyri at vera á tí tryggu síðuni.

Tað er óheppið, tí tískil kunnu tey troka smittað fólk aftur um í bíðirøðini.

Ein grund til mongu kanningarnar kann eisini vera, at arbeiðspláss - og her snýr tað seg um onnur arbeiðspláss enn sjúkrahúsini og bústovnarnir kring landið - krevja, at starvsfólk lata seg kanna, áðrenn tey koma til arbeiðis.

Arbeiðspláss mugu hugsa seg um

Seinastu tvær vikurnar er yvir 20 prosent av kanningarorkuni hjá Sjúkrahúsverkinum farin til at kanna fólk, har arbeiðsplássið hevur kravt eina kanning. Tað er fimtahvør kanning sum Sjúkrahúsverkið ger, verður sagt í tíðindaskrivinum.

Fleiri av hesum kanningum eru heilt vist skilagóðar og neyðugar, men í mongum førum verður hetta helst gjørt fyri at binda um heilan fingur, og tað leggur eitt stórt trýst á kanningarstøðini.

Sjúkrahúsverkið heitir tí á arbeiðspláss um at hugsa seg væl um, áðrenn tey velja at krevja kanningar av øllum starvsfólkunum.

Nú eftirspurningurin eftir kanningum er so stórur, eiga arbeiðspláss at gevast við afturvendandi screeningum av starvsfólki og bert krevja kroonukanning, tá serliga góðar orsøkir eru fyri tí, sigur Sjúkrahúsverkið í tíðindaskrivinum.