Stuðulskonsertin gav góðar 880.000 kr.

Stuðulskonsertin í sjónvarpinum sunnukvøldið til frama fyri jólahjálp til barnafamiljur í fátækraváða, sum Barnabati skipaði fyri, gav góðar 880.000 kr, upplýsir Barnabati í dag.

Harumframt hevur Stephanie Trónd Larsdóttir latið Barnabata góðar 117.000 kr., sum vóru savnaðar inn á loppumarknaði í heyst til frama fyri "Í menniskjum góður tokki."

Og eins og undanfarin ár, stuðlar Reyði Krossur Føroya átakið hjá Barnabata við 1.000 kr. fyri hvørja umsókn.

260 umsóknir um jólahjálp eru  komnar til Barnabata í ár, og tilsamans fáa 550 børn jólahjálp.

Starvsfólkini hjá Barnabata pakka brøvini í dag, og ætlanin er, at allir umsøkjarar skulu fáa svar fyrsta dagin.