Risabót til danska reiðara fyri at svika við kvotum

Rætturin í Holstebro hevur í dag dømt danska reiðaran Henning Kjeldsen 54 mió. krónur í bóti, fyri at hava svikað við fiskiveiðikvotum.

Aftrat hesum verður hald lagt á 64 mió. úr einum av feløgunum hjá Henning Kjeldsen, og somuleiðis verður hald lagt á vinningsbýti fyri meir enn 160 mió.

Snúgvaði sær undan anti-trust

Málið, sum hevur koyrt í rættinum síðani í fjør vár, snýr seg um, at Henning Kjeldsen millum 2013 og 2019 skal hava svikað við kvotum, við at snúgva sær undan anti-trust lógunum - tað er hvussu stóran part av kvotunum ein einstakur aktørur kann eiga. 

Kjeldsen skal tí hava keypt kvotur, sum á pappírinum vóru átt av øðrum, men sum hann, sambært ákæruvaldinum, var veruligi eigarin av.

Gitte Henning

Kona og sonur vóru strámenn

Millum annað skulu konan, sonur hennara, ein grannskoðari og sakførari hava verið við til at virka sum strámenn, og verið stjórar í feløgum, sum hava keypt sær kvotur.

Í alt 10 fólk vóru ákærd í málinum. Ein var fríkendur, meðan hini átta vóru dømd bøtur fyri í alt 71 mió krónur, skrivar danskir miðlar.