Fuglakrím endaliga staðfest

Nú er endaliga staðfest, at fuglakrímið, sum er funnið í skúgvi í Føroyum, er sama slag, sum er í umferð í Evropa og eisini bleiv staðfest í skúgvi í Hetlandi í summar.

Um fólk finna sjúkan ella deyðan fugl, skulu tey boða Heilsufrøðiligu starvsstovuni frá.

Heilsufrøðiliga starvsstovan biður fólk um ikki at nerta við sjúkan ella deyðan fugl.

Smittar illa

Fuglakrímið, sum er funnið í Føroyum, smittar illa og er sera sjúkuelvandi fyri fugl. 

Dunnur og gæs tola tó fuglakrímið rímiliga væl og gerast ofta ikki álvarsliga sjúkar. 

Men hønur tola ikki væl at fáa sjúkuna.

Kemur smitta í ein høsnaflokk, gerst sannlíkt allur flokkurin sjúkur, og deyðatalið kann blíva sera stórt.

Lítil sannlíkt at fólk verða smittað

Sannlíkindini fyri, at fólk blíva smittað, hava víst seg at vera sera lítil í okkara grannalondum. 

Heilsufrøðiliga starvsstovan minnir tó fólk á altíð at vaska sær um hendurnar eftir samband við fugl.

Í Føroyum hava nógv heimafugl.

Avmarkið sambandið við fugl

Fyri at minka um smittuvandan heitir Heilsufrøðiliga starvsstovan á fólk um at avmarka sambandið millum heimafuglin og villa fuglin. 

Í januar verða sýni aftur tikin og kannað fyri fuglakrím.