Eitt ár síðani fyrsta prikið í Danmark

Í dag er júst eitt ár síðani fyrsta koppsetingin fyri Covid-19 varð gjørd í Danmark.

Síðani tá eru meir enn 11 milliónir koppsetingar gjørdar, og 4,5 milliónir danir hava fingið tvey prik og eru tískil liðugt koppsettir.

Tað skrivar TV2 í dag.

- Koppsetingin hevur verið eitt sera týdningarmikið amboð til at tálma avleiðingarnar av hesi farsóttini, sigur Tyra Grove Krause, fakligur stjóri hjá Serumsstovninum, við TV2.

Færri innleggingar

Hetta grundar hon á, at sjálvt um smittutølini eru tríggjar ferðir so høg sum fyri einum ári síðani, eru færri innløgd á sjúkrahúsini.

Og helvtin av teimum, sum liggja á intensivu deild, eru ikki koppsett, so tað er einki at ivast í, at koppsetingin verjir móti álvarsligum avleiðingum av Covid-19, sigur Tyra Grove Krause.

Hon sigur, at myndugleikarnir eisini hava lært nakað hetta seinasta árið.

Koppseting, koppseting fyri koronu - Mynd: Heilsumálaráðið

Neyðugt við triðja priki

Til dømis, at tað bleiv neyðugt við einum triðja priki, og at koppsetingin ikki heldur so øgiliga leingi. Koppsetingin hevur heldur ikki megnað at fyribyrgja smittuútbreiðslu, men tað var hon heldur ikki gjørd til, vísir Tyra Grove Krause á.

Fyrsta koppsetingin fyri Covid-19 í Føroyum varð gjørd 30. desember í 2020.

Seinasta dagføringin á korona.fo frá 22. desember vísir, at 75,4 prosent av samlaða fólkatalinum í Føroyum hava fingið annað prikið og eru harvið liðugt koppsett.