Nú verða koronuátøkini tikin av

Bárður á Steig Nielsen, løgmaður, segði á tíðindafundi fyrrapartin, at nú verða koronutøkini tikin av.

Hetta verður gjørt trimum stigum.

28 februar væntar løgmaður, at allar koronuavmarkingar verða tiknar av, men hetta er treytað av at sjúkrahúsverkið ikki er undir trýsti, og aðrir týdningarmiklir stovnar í samfelagnum hava eitt vanligt virksemi.

Bjarni Árting Rubeksen tók myndirnar.

Michael Boolsen, fúti

Tummas í Garði, læknastjóri

Bárður á Steig Nielsen, Tummas í Garði, Marjun Dalsgaard

Ætlanin er gjørd í samráð við farsóttarnevndina og heilsumyndugleikan, og hon byggir á hesi stig:

Í dag:

• Savningarmarkið er framvegis 100 fólk, men har umstøðurnar loyva tí, kunnu fleiri enn 100 fólk savnast.
• Fyrireikarar kunnu venda sær til koronaráðgevingina fyri at fáa nærri vegleiðing. Teldupost: corona@arb.fo
   

1. februar:

• Náttarlív og matstovur kunnu hava opið sum vant.
• Sóttarhaldsreglurnar verða linkaðar soleiðis, at fólk sum eru koppsett skulu ikki í sóttarhald, um tey hava havt “tætt samband” við ein smittaðan.
• Mannagongdin í samband við koronakanningar verður broytt. Tey sum skulu kanna seg fyri korona, gera hetta við eini skundkanning.
• PCR kanningar skulu 1. februar bert nýtast til:
  • Fólk við sjúkueyðkenni
  • Tøttu kontaktirnar hjá teimum, sum er smittað. Tað vil siga húskið.
  • Fólk sum hava fingið positiva skundkanning.
     

15. februar:

• Sóttarhaldsreglurnar verða linkaðar soleiðis, at bert tey sum eru smittað, sum skulu í sóttarhald.
  Tað vil siga fólk, sum hava eina positiva skundkanning ella positiva PCR kanning.
   

28. februar:

• Allar koronaavmarkingar verða tiknar av.
  Hetta er treytað av, at sjúkrahúsverkið ikki er undir trýsti og at aðrir týdningarmiklir stovnar í samfelagnum hava eitt vanligt virksemi.

Løgmaður sigur:

“Eg gleðist um, at vit í dag kunnu leggja eina ætlan fram um, hvussu vit taka seinastu stigini móti vanliga gerandisdegnum. Eg veit, at hetta kann tykjast djarvt. Eg eri eisini fullgreiður um, at støðan lættliga kann broytast. Men eg haldi, at tað er týdningarmikið, at fólk vita, at vit ætla okkum aftur til ein vanligan gerandisdag." 

Hoyr innslag við Bárði á Steig Nielsen í útvarpstíðindunum her: