Danmark strikar allar koronuavmarkingar 31. januar

Danmark eigur at strika nærum allar koronuavmarkingar 31. januar.

Tað stendur í einum tilmæli frá donsku farsóttarnevndini, sum er sent fleiri ráðharrastovum, og sum sjónvarpsstøðin TV2 eisini hevur fingið hendur á.

Farsóttarnevndin sigur, at korona eigur ikki at verða mett sum ein sjúka, ið hóttir samfelagið, eftir 5. februar.

Og mælt verður til, at allar koronuavmarkingar verða settar úr gildi 31. januar.

Sostatt verða allar avmarkingar í náttarlívinum, krav um masku og koronupass tiknar av.

Varðveita kravið um koronukanning

Farsóttarnevndin mælir kortini til, at kravið um koronukanning og sóttarhald í sambandi við, at fólk koma til Danmarkar, framvegis verður í gildi í ein mánað aftrat.

Mette Frederiksen, forsætisráðharri, hevur boðað frá tíðindafundi í morgin um koronustøðuna.

Higartil hevur stjórnin fylgt tilmælunum frá farsóttarnevndini neyvt.