Lærarafelagið: Mugu varðveita reallønina

- Minsta krav má vera, at vit halda reallønina, og helst nakað meira enn tað, nú búskapurin er undir trýsti.

Tað skrivar Lærarafelagið á heimasíðuni hjá Skúlablaðnum.

Lærarafelagið skrivar, at við vaksandi brúkaraprístalinum, er reallønin í veruleikanum lækkað góð tvey prosent seinasta árið, tí meðan brúkaraprístalið sambært Landsbankanum er hækkað 3,4 prosent seinasta árið, er lønin hjá lærarunum bert hækkað við 1,25 prosent í sama tíðarskeiði.

- Hetta skal havast í huga, tá Lærarafelagið skal samráðast aftur við Fíggjarmálaráðið í heyst, skrivar Lærarafelagið, sum leggur aftrat, at tað helst ikki skal gerast siðvenja, at aðrir fakbólkar hava fingið meira enn lærararnir til sáttmálasamráðingarnar seinastu árini.