Ikki nóg nógvar upplýsingar at taka málið uppaftur

Vinnukærunevndin hevur endaliga staðfest avgerðina hjá Jarðfeingi um at geva SEV loyvi at seta 13 vindmyllur upp í Húsahaga í Suðurstreymi

Vinnukærunevndin sigur, at í umsóknini um uppafturtøku eru ikki slíkar upplýsingar, sum geva nevndini grundarlag fyri at taka málið uppaftur.

Høgni Djurhuus

Johnsigurd Johannesen

05.07.2013 - 08:15

Bara ein nýggj upplýsing var við í umbønini um at taka málið uppaftur. Og hon var ikki avgerandi. Tí viðgjørdi Vinnukærunevndin ikki kæruna hjá smápartafelagnum Vindrøkt av nýggjum.

Vinnukærunevndin hevur tí endaliga staðfest avgerðina hjá Jarðfeingi at geva einum felagi, sum SEV og Magn fara at stovna, loyvi at seta upp 13 vindmyllur í Húsahaga í Suðurstreymi. Vinnukærunevndin sigur í niðurstøðu sínari, at bara ein nýggj upplýsing er komin frá Vindrøkt.

Løgdu upp fyri óvæntaðum útreiðslum

Vindrøkt sigur, at felagið í umsókn sínari legði upp fyri óvæntaðum útreiðslum. Talan er um 8,25 miljó. kr., sum eru við í íløgukostnaðinum, sum er 110 miljó. kr. Her er talan um eina nýggja upplýsing, sigur Vinnukærunevndin. Men hon er tó ikki mett at geva grundarlag fyri uppafturtøku, tí hon kann ikki broyta avgerðina, sum er tikin.

Heildarkostnaðurin í tilboðnum er avgerandi, ikki hvussu hvør upphædd er nevnd í tilboðnum, sigur Vinnukærunevndin. Vinnukærunevndin sigur, at í umsóknini um uppafturtøku eru ikki slíkar upplýsingar, sum geva nevndini grundarlag fyri at taka málið uppaftur.

Hendan avgerðin hjá Vinnukærunevndini er tí endalig í fyrisitingini. Men hon kann leggjast fyri Føroya rætt.