Nevningarting um málið í Hvannasundi byrjar í dag

Nevningatingið, har ein maður er ákærdur fyri dráp, byrjar í dag.

Tann 26 ára gamli maðurin, sum var ákærdur fyri dráp, var 7.juli í fjør fríkendur í nevningatingi í Føroya rætti.

Ákæruvaldið skeyt dómin inn fyri Landsrættin. 

Einki læknaligt prógv fyri dráp

Maðurin er ákærdur fyri um náttina 20.november 2012 at hava dripið 16 ára gomlu Mariu Fuglø Christiansen við á ógreiðan hátt at hava kastað ella skumpað hana á sjógv í Hvannasundi, fyri síðani at vera farin frá henni so hon druknaði. 

Nevningatingið í Føroya rætti segði einmælt, at neyðugu prógvini ikki eru løgd fram um, at maðurin hevur dripið gentuna. 

Í dóminum er dentur lagdur á, at einki læknaligt prógv er fyri, at nakað revsivert er farið fram.

Krevja frídøming

Eisini kundi ivi setast við nógvar vitnisfrágreiðingar, var niðurstøðan hjá nevningatinginum. 

Verjin hjá ákærda manninum, Karina Skou, sigur, at tey fara, eins og í Føroya rætti, at krevja frídøming.