Atkvøða um landsroknskapin í dag

Tvey mál eru á dagsskránni fyri tingfundin seinnapartin í dag.

Tingið skal atkvøða um og avgreiða endaliga uppskotið til samtyktar um at góðkenna landsroknskapin fyri 2020.

Og uppskotið um eykajáttan hjá Bjarna Hammer skal hava fyrstu viðgerð. 

Løgtingið fer í dag at atkvøða um landsroknskapin fyri 2020. 

Løgtingsgrannskoðararnir hava nógvar viðmerkingar um landsroknskapin í uppskotinum til samtyktar um at góðkenna hann.

Ikki fullfíggjaður

Løgtingsgrannskoðararnir leggja serligan dent á, at landsroknskapurin er ikki fullfíggjaður, millum annað tí, at nakrir stovnar og grunnar eru ikki við í fíggjarlógini, landsroknskapinum ella í fíggjarstøðuni, og at tølini í nógvum roknskapum samsvara ikki við landsroknskapin.

Fíggjarnevndin tekur undir við løgtingsgrannskoðarunum.

Men nevndin sigur tó í sínum áliti, at nógv viðurskifti, sum løgtingsgrannskoðararnir vístu á, eru fingin í rættlag.

Bjarni Hammer vil hava fimm milliónir krónur aftrat til Strandfaraskip landsins, so sleppast kann undan at hækka farmagjøldini hjá Smyrli.

Tingfundurin í dag er kl.13.00.