BankNordik letur stórt vinningsbýti

Fríggjadagurin 25.mars verður ein góður dagur hjá teimum, sum eiga partabrøv í BankNordik, tí tá fer bankin at lata góðar 40 kr. í vinningsbýti fyri partabrævið.

Nevnd bankans fer á aðalfundinum at mæla til at lata 14,17 kr. í vinningsbýti fyri 2021, tað svarar til helvtina av yvirskoti samtaksins, 136 mió kr. 

Haraftrat koma 26,04 kr. í serstøkum vinningsbýti, tí bankin seldi danska virksemið hjá sær.

Nýggir nevndarlimir

Nevndin fer eisini at mæla til, at nýggir nevndarlimir verða Birita Sandberg Samuelsen, advokatur, og Kristian Reinert Davidsen, stjóri í Tusass, sum fyrr var Tele Grønland.

Hini í nevndini skulu veljast aftur, mælir nevndin til.

Tey eru Jóhanna Lava Køtlum, sum er forkvinna, Jógvan Jespersen, næstformaður, og Michael Ahm.

Í nevndini nú eru eisini Sverre Bjerkeli og Ben Arabo.

Haraftrat eru tvey fólk fyri starvsfólkini og eitt fyri samtakið í nevndini.