Fyribils vápnahvíld í syðra parti av Ukraina

Álopini á býirnar Mariupol og Volnovakha, sum eru havnabýir í syðra parti av Ukraina, hava seinastu dagarnar verið sera ógvuslig. 

Hetta hevur fingið myndugleikarnar í býunum, at eftirlýsa eina sokallaða humanitera gongd. 

Avtala ímillum partarnar er fingin í lag, sum hevur við sær, at fyribils vápnahvíld nú er lýst í hesum býum. 

Klokkan 07.00 í morgun, løgdu partarnir vápnini, soleiðis at íbúgvar trygt kunnu sleppa úr býunum. 

Ukrainskir myndugleikar upplýsa, at tað verður møguligt hjá íbúgvum at fara úr býnum í dag, ímillum klokkan 09.00 og 14.00 (føroyska tíð), uttan at óttast at verða álopin. 

Sambært russiska verjumálaráðnum skuldu russisku herfólkini, stegða við at skjóta í morgun klokkan sjey. 

Hetta upplýsir russiska tíðindastovan Interfax, sambært Reuters. 
 

Sambært The Guardian er ætlanin at flyta 200.000 fólk úr Mariupol og 15.000 fólk úr Volnovakha. 

Miðilin vísir eisini á, at tað enn ikki er vátta, hvørt vápnini í hesum báðum býum, eru løgd ella ikki.