Langtíðarsjúk fáa dagpening í 52 vikur

Nú fáa langtíðarsjúk dagpening í longri tíð.

Løgtingið hevur í dag einmælt samtykt uppskotið um broyting í dagpeningalógini, sum Sólvit E. Nolsø, landsstýrismaður í almannamálum, legði fyri løgtingið.

Broytingarnar hava við sær fleiri ymiskar batar, sum fáa stóran týdning fyri fólk, sum higartil eru dottin niður ímillum ymsar vælferðarskipanir.

Sambært galdandi lóg kann dagpeningur vegna sjúku í mesta lagi veitast í 40 vikur, svarandi til umleið níggju mánaðir.

52 vikur

Tað er ikki óvanligt, at fólk við krabbameini eru óarbeiðsfør longur enn níggju mánaðir, og hava tá onga inntøku havt, tí rætturin til sjúkradagpening er dottin burtur. Umframt heilsuligu avbjóðingarnar hevur sostatt verið talan um ein fíggjarligan smeit fyri sjúklingin.

Frameftir kann dagpeningur veitast í 52 vikur, umframt at dagpeningur í ávísum førum eisini verður veittur longur enn 52 vikur.

Lógin inniheldur eisini aðrar broytingar, m.a. betri treytir hjá smærri vinnurekandi í dagpeningaskipanini, og at tey við útsettari pensjón fáa rætt til dagpening í sambandi við sjúku.

Lógin, sum júst er samtykt, kemur í gildi 1. apríl.