Gongur illa hjá russum at taka Kyiv

Líkt er til, at russiska innrásin í Ukraina er steðgað upp, og at russiski herurin ikki er førur fyri at taka m.a. høvuðstaðin, Kyev, í løtuni, skriva útlendskir miðlar.

Ukrainsku deildirnar, sum verja høvuðsstaðin, stríðast manniliga, og forða russisku deildunum at taka høvuðstaðin. Í staðin royna russisku deildirnar at taka býarpartar í útriðuni av Kyiv, samstndis sum Russland er farið undir at bumba býarpartar í Kyiv, har sivilfólk búgva.

MInst fýra fólk lógu eftirá í slíkum álopum í nátt.

Fólk í Kyiv sleppa ikki út fyri dyr í løtuni, tí borgarstjórin lýsti útigongubann í 35 tímar í gjár.

Hernaðargreinarar siga seg rokna við, at Russland annaðhvørt má leggja á annan bógv, og senda fleiri herfólk til Ukraina, ella má landið royna at finna eina samráðingarloysn, og á tann hátt fáa okkurt burturúr.

Framstig í samráðingum

Ukrainski forsetin, Selensky, segði í gjárkvøldið, at tað gongur framá við samráðingunum í millum londini, og at Russland nú tekur samráðingarnar í størri álvara, enn landið hevur gjørt. Men hann kegði dent á, at viðurskiftini mugu mýkjast enn meir, og at tað fer at taka einar 14 dagar.

Hernaðarserfrøðingar siga seg hava varhugan av, at Russland hevur nýtt allar teir um 200.000 hermenninar, sum vóru við markið til Ukraina, í krígnum,og ætlar landið at vina á ukrainum, so skulu fleiri hermenn til.

Tí verður tosað um, at Russland fer at taka hermenn heim úr Sýria, og seta teir í innrásina í Ukraina.