Framvegis blámusoppur á politistøðini í Havn

Fýra kanningar eru gjørdar av inniluftini, síðani politistøðin í Havn flutti í hølini Yviri við Strond fyrst í 2011.

Tvær tær fyrstu kanningarnar staðfestu, at blámusoppur var á politistøðini. Eftir at hølini vóru vaskað, vórðu nýggjar royndir tiknar av veggum, gólvum og gólvkonstruktiónini umframt av luftini og ventilatiónini. Men hesar royndirnar staðfesta altso, at blámusoppur framvegis er í nøkrum hølum. Fyrradagin var fundur millum politiið í Føroyum, Bygningsstyrelsen, sum leigar hølini, og útleigaran, sum eigur hølini, um úrslitini av kanningini og um hvat nú skal gerast.

Kanna møguleikarnar

Haldis Poulsen fyrisitingarstjóri hjá Politiinum í Føroyum sigur, at politiið nú fer at gjøgnumganga kanningarnar nærri og tilmælini um, hvat kann gerast, og at tey samráðast við útleigaran um at finna eina loysn. Hon kann tí ikki siga enn, um talan verður um umvælingar, ella um talan møguliga kann verða um at leiga onnur høli.

Haldis Poulsen leggur afturat, at støðan ikki er ikki álvarsom, men at nógv starvsfólk kenna ampa, sum kann stava frá blámusoppi. Tí er tað sera týdningarmikið at finna eina loysn skjótast gjørligt, sigur fyrisitingarstjórin. Politiið flutti annars úr hølunum í Jónas Broncksgøtu til hølini Yviri við Strond fyrst í 2011, tí at blámusoppur var staðfestur í hølunum í Jónas Broncksgøtu.