Myndlýsingar av Fuglakvæðinum á Christiansborg

Klaksvíkar kommuna skipar fyri framsýning á Christiansborg í dag. 

Tiltakið er komið í lag, eftir at danskir fólkatingslimir vóru á vitjan hjá Klaksvíkar kommunu í september í fjør.

Í sambandi við vitjanina var vitjað í Christianskirkjuni og í verkstovuni hjá Edwardi Fuglø, sum legði síðstu hond á myndlýsingar til eina danska týðing av Fuglakvæðinum. 

Fólkatingslimurin fyri sosialdemokratiska flokkin, Rasmus Horn Langhoff, var hugtikin av listini hjá Edwardi Fuglø og hevur síðani vitjanina samskift við kommununa um at fáa í lag at sýna listaverkini fram á Christiansborg.  

Í tí sambandi skipar kommunan fyri einum tiltaki, har umboð frá kommununi eftir ferniseringina á Christiansborg fara at hava eina framløgu um møguleikar og tilboð í Klaksvíkar kommunu. 

Framsýningin byrjar í dag klokkan 16.