Barnaskúlin í Fuglafirði vígdur leygardagin

Stórt hátíðarhald verður í Fuglafirði leygardagin, tá skúlabygningurin verður vígdur og tikin í nýtslu.

Jógvan Fríðriksson, bispur, vígir skúlan, og Jenis av Rana, landsstýrismaður í mentamálum, fer at halda røðu.

Hetta verður klokkan 14.30 og tá verður eisini frumframførsla av verkinum "Songur til Fuglafjarðar skúla."

Talan er um tónleika- og listaverk, sum Alexendur Kristiansen, Frits Johannesen og Jógvan á Lakjuni hava gjørt til skúlan. Teir tríggir eru eisini allir lærarar.

Alexandur Kristiansen hevur skrivað yrkingina, Frits Johannesen hevur gjørt eitt listaverk út frá henni, og Jógvan á Lakjuni hevur skrivað tónleikin.

Næmingar og lærarar skúlans framføra.

Millum klokkan 16.00 og 17.30 verður opið hús við fimleikaframførslum, hornorkestri, livandi verkstaði og framsýningum.