![](https://www.uf.fo/sites/default/files/styles/myndasavn-width/public/teistin_gamlaraett.jpg?itok=RcEKDb5T)
- Tíðindi, mentan og ítróttur
Samráðast aftur um Herjólf í dag
![](https://kvf.fo/sites/default/files/styles/grein-ovasta-mynd/public/9709958b838635f95961225cd0d142e9f64ec8f97f297e9eb02ef4597d804b4a_713x0.jpg?itok=qmOhdtpw)
Íslendska felagið, Vegagerðin, vil ikki lata føroyingum ferjuna, Herjólf 3, fyrr enn felagið hevur funnið eina aðra loysn á sínum egna flutningi.
Tí tekur tað so drúgva tíð at finna eina endaliga loysn, sigur Jóhan Petur Abrahamsen, rakstrarleiðari á Strandfaraskipum Landsins. Men hann sigur seg framvegis vænta, at ein loysn verður funnin, og partarnir skulu tosa saman aftur seinnapartin.
Lættari sagt enn gjørt
Hann sigur, at tað er lættari sagt enn gjørt at finna ferjur, sum kunnu sigla um okkara leiðir. Tað eru ferjur, sum eru bygdar í 70unum og fyrst í 80unum. Eftir tað eru ferjurnar bygdar til ávís økir og til at halda í eitt ávíst áramal. Tí er ikki lætt at finna ferjur, sum kunnu sigla um okkara leiðir.
Jóhan Petur Abraham sigur seg framvegis vóna, at ein loysn verður funnin, og at Strandferðslan sleppur at langtíðarleiga íslendsku ferjuna, so Smyril kann fara í dokk sum ætlað seinast í august.
Vónandi verður nýggja turrdokkin á Skála klár, tá Smyril skal í dokk næstu ferð, tí tað hevði hjálpt væl upp á støðuna, sigur rakstrarleiðarin.
Íslendingar hava áhuga fyri Teistanum, men hann má sigla, til koyrandi er í Sandoyartunlinum. (Mynd: Bjarni Árting Rubeksen)
Samráðast eisini um Teistan
Teistin er ein partur av samráðingunum við íslendska felagið, men hann má sigla, til Sandoyartunnilin er liðugur.
Tað er ikki óvist, at íslendska felagið kann nýta Teistan til sítt virksemi, um smávegis broytingar verða gjørdar, og tí er hann við í samráðingunum, sigur Jóhan Petur Abrahamsen.
Ætlanin er, at Herjólfur skal sigla saman við Smyrli á Suðuroyarleiðini og fyri Smyril, tá hann skal í dokk seint í summar.
Tá Herjólfur 4, sum kom fyri Herjólf 3, skal í dokk í oktober, fer Herjólfur 3 til Íslands at loysa av.
Minni enn Smyril
Herjólfur 3 er bygdur í Noregi í 1992 og er 2.222 bruttotons. Skipið er 71 metrar langt og 16 metrar breitt, og tekur 500 ferðafólk og 55 bilar. Ferðin er 16,5 míl.
Talan er tí um eitt skip, sum er nakað væl minni enn Smyril.
Smyril kann taka 800 ferðafólk um veturin og 950 um summarið og 200 bilar ella 30 treilarar. Og Smyril kann sigla upp í 21 míl.