Smáligt fiskarí hjá ísfiskalínuskipunum

Nú í dymbildagavikuni eru trý ísfiskalínuskip úti. Fiskamarknaðurin væntar, at øll avreiða í vikuni. 

Tey hava smáligt fiskarí.  

Tvey frystilínuskip eru við Ísland, eitt við Eysturgrønland og trý undir Føroyum.

Fiskamarknaðurin væntar ikki nógvan útróður nú í vikuni.

Streymurin harðnar

Streymurin harðnar sum vikan gongur. Veðrið verður umskiftandi og so koma páskirnar.

Báðir djúpvatnstrolararnir liggja, men møguliga fer annar út í vikuni.

Trolbátar liggja

Um partrolarar verður sagt, at seks pør eru til fiskarí. 

Fiskaríð er misjavnt, okkurt brúkiligt hál. Trolararnir avreiða í vikuni.

Allir trolbátar liggja.

Tvey garnaskip fiska svartkalva og tvey havtasku. Fiskaríð er brúkiligt. Øll garnaskipini avreiða í vikuni, sigur Fiskamarknaður Føroya.