Inflatiónin rakar serliga smáar inntøkur

Inflatiónin hækkar nú aftur. 

Brúkaraprístalið, ið er eitt mát fyri inflatiónina, er vaksið við 4,4%, frá fyrsta ársfjórðingi í fjør til fyrsta ársfjórðing í ár.

Inflatiónin hækkar eisini í øðrum londum. Serliga eru prísirnir á orku, t.e. olju og gassi, hækkaðir nógv, men eisini matvørur, klæðir og samskifti eru vorðin dýrari.

Hækkandi prísir, inflatión, merkir, at borgarin fær minni fyri sína løn, sum aftur ger, at vinnan kann fara at merkja minni eftirspurning eftir vørum og tænastum. At prísstigið hækkar, rakar øll, men harðast tey húsarhald, har inntøkan er lítil, skrivar Landsbankin.