Makrelkvotan verður ásett í hesum mánaðinum

Føroyska makrelkvotan fyri 2022 verður ásett hálvan juni ella stutt eftir tað.

Bíðað verður eftir, hvat norska kvotan verður, og hon er heldur ikki ásett enn.

Men skipini, sum plaga at fiska makrel, kunnu byrja longu nú, tí tey hava fingið tað flutt, sum tey ikki fiskaðu í fjør, sigur Árni Skaale, landsstýrismaður.

Uppskotið um kvotu skal í Uttanlandsnevndina hjá løgtinginum, áðrenn tað verður almannakunngjørt.

Árni Skaale

Árni Skaale er landsstýrismaður í fiskivinnumálum.

Tvey samráðingarumfør

Tvey samráðingarumfør hjá strandarlondunum um makrel vera nú í juni, 8. og 9.juni og 22. og 23.juni.

Hetta eru fjórða og fimta samráðingarumfar, síðani strandarlondini byrjaðu at samráðast í Havn í september í fjør.

Greitt er, at londini ikki kunnu semjast um býtið í ár. Nú verður roynt at finna býtið í 2023.

Í desember í fjør blivu strandarlondini samd um at fiska 795.000 tons av makreli í ár.

Hetta er tað sama, sum ICES mælir til.