Nýtt fongsul í Føroyum í 2030

Ríkismyndugleikarnir og landsstýrið eru samd um at fara undir tilgongd at byggja nýtt og størri fongsul í Føroyum í staðin fyri arrestina í Mjørkadali.

Tað siga Mette Frederiksen, forsætisráðharri, og Bárður á Steig Nielsen, løgmaður, í eini felags yvirlýsing eftir fundin í Tinganesi fyrrapartin.

Tilgongdin verður í trimum stigum:

• Í 2023 og 2024 verður verkætlan gjørd fyri byggingina og staðsetingin til nýggja fongslið funnin.
• Í 2025 og 2026 verður hóskandi grundøki útvegað og gjørt byggibúgvið.
• Frá 2027 til 2030 verður nýggja fongslið bygt.        

Í yvirlýsingini stendur eisini, at stjórnin fer beinan vegin at seta pening av til at gera verkætlanina. Fígging til at byggja fongslið verður sett av, tá verkætlanin og kostnaðarmeting eru gjørd.

Fíggingin er treytað av, at fólkatingið tekur undir við henni, stendur m.a. í yvirlýsingini frá Mette Frederiksen og Bárði á Steig Nielsen.

Meiri verður at frætta í útvarpstíðindunum á middegi.