Løgmaður: Lagt er upp fyri príshækkingini

Tey, sum hava almennar veitingar sum høvuðsinntøku, hava eisini vøkstur í inntøkuni, tí upphæddin verður prístalsjavnað, so hon svarar til prísvøksturin í samfelagnum og lønarvøkstrinum hjá teimum alment løntu.

Og partarnir á arbeiðsmarknaðinum hava skrivað undir nýggjan lønarsáttmála, sum hevur við sær størstu lønarhækkingina í nógv ár.

Við hesum skuldi verið lagt upp fyri príshækkingini í løtuni.

Tað sigur Bárður á Steig Nielsen, løgmaður, í svari til Beintu Løwe, løgtingskvinnu, sum spurdi, hví løgmaður ikki metir tað vera skilagott at veita lágløntum hjálparpakka beinanvegin.

matvøruhandlar,matvørur, havragrín, gjaldskort,vørur, prísir, prísvøkstur, tilboð. pengar, peningur, sjávtøkur,reiður peningur, búskaparvøkstur, búskapur

Matvøruprísirnir eru nógv hækkaðir seinastu tíðina, men prísvøksturin er minni enn aðrastaðni í Evropa, sigur løgmaður. (Bjarni Árting Rubeksen)

Taka málið upp á ólavsøku

Báður á Steig Nielsen sigur, at heldur verandi gongd fram, verður hjálparpakki til láglønt eitt av fyrstu málunum, sum verða tikin upp á ólavsøku, tá nýggj tingseta byrjar.

Landsstýrið fylgir neyvt gongdini í búskapinum, og samskifti er millum Løgmansskrivstovuna, Fíggjarmálaráðið og Almannamálaráðið um møgulig tiltøk.

Tað hevur týdning, at møgulig tiltøk verða fyrireikað væl, so tey raka rætt, og soleiðis, at tiltøkini ikki hava aðra ótilætlaða ávirkan á búskapin. Eisini er tað avgerandi, at hesi tiltøkini eru tíðaravmarkað og verða málrættað til teir partar, sum eru harðast raktir av prísvøkstrinum, sigur løgmaður.

Bárður á Steig Nielsen sigur, at higartil kann staðfestast, at prísvøksturin í Føroyum hevur verið minni enn aðrastaðni í Evropa, síðani kríggið í Ukraina brast á. 

Beinta Løwe

Beinta Løwe, løgtingskvinna, spurdi løgmann um hjálparpakka til láglønt. (Mynd: Bjarni Árting Rubeksen)