Fleiri menn doyggja av krabbameini

Alsamt fleiri føroyskir menn doyggja av krabbameini, vísa tøl hjá Hagstovuni. 

Árini frá 2010 - 2020 doyðu í miðal 58 menn í Føroyum av krabbameini um árið. Í 80-unum doyðu í miðal 44 menn árliga.

Fólkatalið í Føroyum er vaksið nógv seinastu árini, og Hagstovan hevur eisini lagt upp fyri hesum í sínum útrokningum.

Títtleikin av monnum, sum doyggja av krabbameini í Føroyum, er síðani 2000 farin úr 1,7 fyri hvørji 1.000 mannfólk upp í 2,2, ið Hagstovan lýsir sum ein "munandi vøkstur".

Hinvegin doyggja færri kvinnur í Føroyum av krabbameini nú enn fyrr. Tann títtleikin er minkaður úr 1,9 niður í 1,3 fyri hvørjar 1.000 kvinnur.