Finnland bíðar eftir Svøríki

Finnland fer ikki upp í NATO, um svenski limaskapurin verður seinkaður orsakað av mótmælunum frá Turkalandi.

Tað segði finski forsetin, Sauli Niinistö, á tíðindafundi saman við Jens Stoltenberg, NATO-aðalskrivara í dag.

Jens Stoltenberg segði á tíðindafundinum, at hald er í stúranini hjá Turkalandi um svensku og finsku umsóknirnar.

Turkaland hevur higartil forðað viðgerðini av umsóknunum, tí londini bæði hýsa felagsskapum, sum Turkaland sigur vera kurdiskar yvirgangsfelagsskapir. Ein teirra er PKK, sum eisini bæði USA og ES meta sum yvirgangsfelagsskapir.

Jens Stoltenberg segði, at NATO má viðurkenna, at onki annað land hevur verið fyri so mongum yvirgangsatsóknum sum Turkaland.