Vil hava størri játtan til føroyskt sum annaðmál

- Føroyskt sum annaðmál má fáa størri játtan.

Tað heldur Jacob Eli S. Olsen, formaður í Lærarafelagnum.

Fíggjarliga er uppgávan at undirvísa tilflytaranæmingum í føroyskum sum annaðmál meira enn tvífaldað eftir fáum árum, men játtanin til økið er ikki vaksin samsvarandi.

Játtanin minkar

Føroya Lærarafelag ásannar, at hóast nýggjar og øktar uppgávur verða lagdar á fólkaskúlan, so minkar samlaða játtanin, ið løgtingið setir av til at reka fólkaskúlan á hvørjum ári.

Henda gongdin kann ikki halda fram, sigur Jacob Eli S. Olsen í samrøðu við Skúlablaðið.

Lærarafelagið hevur víst á, at tað eigur at vera ein serstøk játtan til hesa uppgávu, so at vøksturin ikki fer av samlaðu játtanini til fólkaskúlan.