Skúlin á Fløtum fær tvær stovur aftrat

Tórshavnar býráð hevur nú endaliga samtykt at lata eina millión og 820.000 krónur til tvær nýggjar skúlastovur í skúlanum á Fløtum.

Pengarnir verða tiknir av kontuni, sum eitur nýtt røktarheim við røktaríbúðum. 

Býráðið hevur eisini givið umsitingini loyvi til at fara í endaligar samráðingar og gera arbeiðstøkusáttmála við Articon og Búsetur, sum hava givið tilboð.

Ov lítil

Nýggi skúlin á Fløtum er longu ov lítil. Brúk er fyri fleiri skúlastovum.

Ætlanin er at byggja um fyrilestrasalin í útsynningshorninum móti bilplássinum í Oyggj 7. Fyrilestrasalurin er dupulthøgt rúm. 

Ætlanin er taka niður verandi uppbygging, leggja nýtt dekk í, umleggja tekniskar leiðingar og síðani byggja um til tvær skúlastovur.

Nýggju stovurnar verða bygdar í sama sniði og dygd sum verandi stovur í skúlanum. Útveggirnir vera óbroyttir.

Broytingin krevur dagført byggiloyvi.