- Fer at gera samskifti og samstarv lættari

Ríkisfelagskapurin skal hava sítt egna aðalráð í Danmark. Og ráðharrin skal vera antin úr Føroyum ella úr Grønlandi. Tað sigur konservativi flokkurin í Danmark, sum hevur skotið upp at skipa eitt aðalráð fyri Ríkisfelagsskapin, um flokkurin kemur í stjórn eftir eitt nýval. 

Talsmaðurin í føroyamálum fyri konservativa flokkin, Rasmus Jarlov, sigur, at endamálið við uppskotinum er, at knýta Danmark, Føroyar og Grønland tættari saman, og at fáa ríkisfelagsskapin at virka betri. 

Løgmaður tekur undir við uppskotinum

- Sum útgangsstøði haldi eg tað vera eitt skilagott uppskot. Tað at savna kreftirnar á einum stað fer at gera bæði samskifti og samstarv lættari, sigur Bárður á Steig, løgmaður um uppskotið.

Eitt slíkt aðalráð kann síggjast sum ein menning av tí samstarvinum millum londini, sum er byrjað við samstarvsráðnum, heldur løgmaður.

Umframt at stovna eitt aðalráð fyri ríkisfelagsskapin, ynskir konservativi flokkurin eisini, at Danmarks Radio ger fleiri sendingar um Føroyar og Grønland. Og danski fólkaskúlin skal undirvísa meira um Føroyar og Grønland.