Tónleikaskráin á G! klár

G!-festivalurin kunngjørdi mikukvøldið síðstu 12 tónleikanøvnini, sum skulu upptraðka á ársins G!-festivali, og við hesum eru øll nøvn kunngjørd. 

Afturat teimum longu kunngjørdu nøvnunum sum eitt nú José Gonzáles, Eivør, Teitur, Ásgeir Trausti og Tessa, eru løgd nøvn sum Lena Andersen, Tina Mellem og Guðrið Hansdóttir.  

Í alt skulu 45 tónleikanøvn upptraðka á ársins G!-festivali, sum verður í døgunum 14.-16. juli í Syðrugøtu. Fult yvirlit av øllum nøvnum sæst her. 

Festivalurin í ár verður sum vit kenna hann undan koronu og fer enn einaferð at seta altjóða dám yvir Syðrugøtu, skriva fyrireikararnir í tíðindaskrivi, har teir eisini boða frá, at Grundin fær nýggjan ham hóskvøldið. Tí sum nakað nýtt verður hóskvøldið á Grundini heilagað tungmálminum við nøvnum sum SIC, Impartial, LLNN, Katla, og Iotunn.

Skráin fyri fjósið og barnatiltakið verður kunngjørt í næstum. 

G! Skrá G! festivalur skráin á G!