Seks skip bíða eftir landingartørni á Havsbrún

Havsbrún í Fuglafirði er einasti møguleiki, tá landast skal til ídnað, og bara 15 prosent kunnu landast uttanlands

Makrelurin er feitur í løtuni, og tí verður hann landaður til ídnað. (Savnsmynd)

08.08.2022 - 13:08

Eini seks nótaskip við fullari last av makreli liggja í hesum døgum og bíða eftir at sleppa framat at landa til Havsbrún í Fuglafirði.

Makrelurin er serliga feitur hesa tíðina, so ikki slepst av við hann til matna, tí hann heldur sær ikki so væl. Havsbrún er einasti møguleikin, tá ið landast skal til ídnað í Føroyum.

Skipini noyðast at landa makrelin í Føroyum, tí eftir lógini um sjófeingi kunnu skipini ikki landa meira enn 15 prosent uttanlands, uttan at landsstýrismaðurin gevur undantaksloyvi til tað.

Christian í Grótinum

Christian í Grótinum hevur bíðað eftir landingartørni síðani mikudagin. (Savnsmynd: Bjarni Árting Rubeksen)

Tíð fer fyri skeytið

Men einki undantaksloyvi er komið, og tá tað tekur hálvttriðja samdøgur at sigla á fiskileið og hálvttriðja samdøgur at sigla innaftur, fer dýrabær tíð til spillis hjá nótaskipunum, sum helst vildu fiskað mest møguligt av kvotuni.

Páll Klein Rasmussen er skipari á Christian í Grótinum, ið kom inn mikudagin, men síðani hevur ligið í Klaksvík og bíðað eftir landingartørni í Fuglafirði:

1542528