Sammóðir: Ymisk boð um eftirnøvn hjá børnum

Ymisk boð koma úr landsstýrinum um eftirnavnið hjá børnum, sum hava sammóður.

Hóast hugtakið sammóðir ikki var við, tá navnalógin var samtykt, kunnu børn fáa eftirnavnið hjá sammóður.

Umhvørvis- og Vinnumálaráðið, sum umsitur navnalógina, sigur, at tí er ikki neyðugt at broyta lógina.

Ráðið heldur, at lógin, sum hon nú er orðað, umfatar eisini sammøður. Tær kunnu sammetast við faðir ella móður, og kunnu tí fáa eftirnavnið hjá sammóður.

Skrásetast í landsfólkayvirlitinum

Børn, sum hava eftirnavnið hjá sammóður, kunnu eisini vera skrásett í landsfólkayvirlitinum, metir Umhvørvis- og Vinnumálaráðið.

Sambært fólkayvirlitslógini verða øll, sum hava persónstal, skrásett í landsfólkayvirlitinum.

Ættarsamband millum foreldur og børn verður skrásett við p-tølunum hjá faðir og móður.

Er talan um sammóður, verður hennara p-tal brúkt.

Jógvan Fríðriksson, Biskupur

Jógvan Fríðriksson, biskupur, fær viðhald í Mentamálaráðnum. (Mynd: Bjarni Árting Rubeksen)

Ikki loyvt at broyta heiti

Men Uttanríkis- og Mentamálaráðið heldur nakað annað.

Jógvan Fríðriksson, bispur, hevur boðað sóknarprestunum frá, at ikki er loyvt at broyta heitið hjá pápanum í kirkjubókini til sammóður ella samfaðir. 

Hetta merkir, at børn hjá samkyndum foreldrum kunnu ikki skrásetast við eftirnavninum hjá sammóður ella samfaðir.

Og bispur fær viðhald í Uttanríkis- og Mentamálaráðnum. Lógin loyvir ikki, at heitini verða broytt, sigur ráðið.