Bretland herðir kanska innferðarloyvi hjá russum

Bretland fer møguliga at herða krøvini til russiskar ríkisborgarar at fáa innferðarloyvi til Bretlands.

Tað sigur verjumálaráðharrin, Ben Wallace, sambært the Guardian.

Tað sigur hann, eftir at Finnland, Estland og Kekkia hava heitt á ES um at gevast við at geva russarum ferðafólkavisum í Schengen-londunum, sum avleiðing av russisku innrásini í Ukraina.

- Eg haldi avgjørt, at vit kunnu herða krøvini, men eg eri ikki vísur í, at eitt forboð er rætti leisturin, sigur Ben Wallace.

Hann leggur aftrat, at sær dámar lítið at síggja makarnar hjá oligarkum ella russiskum embætisfólkum hugna sær í suðurevropa, meðan russiski herurin fremur krígsbrotsverk í Ukraina.