Eygleiðari: Føroyingar vilja hava sambandsflokkar á fólkating

Ein nýggj veljarakanning, sum Spyr.fo hevur gjørt fyri Blaðið Vikuskiftið, gevur ábending um, at Javnaðarflokkurin og Sambandsflokkurin varðveita fólkatingssessirnar.

Fólkatingið, Fólkatingssalurin, Christiansborg

Redaktørurin á blaðnum Vikuskiftið, Ingi Samuelsen, heldur, at veljarar peika á Sambandsflokkin og Javnaðarflokkin til at umboða Føroyar á fólkatingi, tí flokkarnir eru sambandsflokkar, sum ganga inn fyri ríkisfelagsskapinum. 

"Umboðini fyri Javnaðarflokkin og Sambandsflokkin kenna, at tey hava nakað at gera á Christiansborg og eru ikki har fyri at mótarbeiða ríkisfelagsskapinum," staðfestir Ingi Samuelsen. 

Veljarakanning, sum Spyr.fo hevur gjørt fyri Blaðið Vikuskiftið hjá Portalinum, vísir, at Sambandsflokkurin hevur stóra afturgongd og Javnaðarflokkurin stóra framgongd. Hóast tað, so vinna hesir báðir flokkarnir tó sannførandi á hinum báðum stóru flokkunum í kappingini um fólkatingsessirnar.

Veljarakanning, Fólkatingsvalið

Javnaðarflokkurin stendur til at fáa 31,5 prosent av atkvøðunum og Sambandsflokkurin 23,7 prosent, meðan Tjóðveldi og Fólkaflokkurin eru væl aftanfyri við ávikavist 19,1 og 16,5 prosentum.

"Stóra afturgongdin hjá Fólkaflokkinum er bjargingin hjá Sambandsflokkinum," heldur Ingi Samuelsen, redaktørur á Blaðnum Vikuskiftið. 

Enn eru tó nakrir veljarar eftir at kappast um, tí kanningin vísir, at níggju prosent av veljarunum ikki hava tikið støðu til, hvør skal fáa atkvøðuna.

Veljarakanning, Fólkatingsvalið

500 fólk svaraðu kanningini, ið Spyr.fo gjørdi mikudagin 24. august 2022. Spyr.fo hevur umleið 5000 fólk í svarpanelinum, og tey spurdu verða tilvildarliga vald út, so býtið samsvarar við fólkið í mun til kyn, aldur og geografi. Úrslitini eru vigað í mun til, hvat fólk valdu til fólkatingsvalið 2019.

Fólkatingið, Fólkatingssalurin, Christiansborg