Kunnu vænta drúgvar lønarsamráðingar

Hóast sáttmálin millum Føroya Lærarafelag og Fíggjarmálaráðið fer úr gildi leygardagin 1. oktober, byrja samráðingarnar millum partarnar ikki fyrr enn 20. oktober.

Og ikki fyrr enn tá fara partarnir at leggja krøvini fram, sigur formaðurin í Føroya Lærarafelag, Jacob Eli S. Olsen.

Hann sigur, at ymisk viðurskifti hava gjørt, at samráðingarnar ikki eru byrjaðar fyrr, men nú er so avtala gjørd um at fara undir at samráðast.

Føroya Lærarafelag hevur høvuðssáttmála, og eftir honum er verandi sáttmáli í gildi, til semja er fingin um ein nýggjan sáttmála.

Jan Mortensen

Jan Mortensen er stjóri á Lønardeildini. 

14 sáttmálar

Umframt sáttmalan hjá Føroya Lærarafelag, fara 14 aðrir sáttmálar úr gildi 1. oktober.

Jan Mortensen, stjóri á Lønardeildini sigur, at vanliga mannagongdin er, at samráðingar eru við feløgini eftir stødd. 

Lønardeildin hevur tosað við Akademikarafelagið um samráðingar, men felagið sigur seg ikki kunna byrja at samráðast fyrr enn seinast í oktober.

Tí verður arbeitt við at fáa samráðingar í lag við onnur feløg fyri 20. oktober, sigur Jan Mortensen.

Samráðst verður framvegis um tveir sáttmálar sum fóru úr gildi í 2020, sigur stjórin á Lønardeildini.

Dregur út

Lítil ivi er um, at tað fer at draga út at fáa sáttmálar í lag, tá byrjað verður so seint, men tað eru ymisk viðurskifti, sum eru orsøk til tað, sigur Jan Mortensen.

Hvat úrslit fólk kunnu vænta, vil stjórin á Lønardeildini ikki gera viðmerkingar til, men hann viðgongur, at uttan iva verður krav um hægri løn, nú alt dýrkar.

Hann vil kortini ikki gera nakrar viðmerkingar til tað, tí tað er ikki vanligt, sigur Jan Mortensen, stjóri á Lønardeildini.