- Tíðindi, mentan og ítróttur
Nýtt ferðslumet í Eysturoyartunlinum
5.417 akfør koyrdu í Eysturoyartunlinum í miðal í september.
Tað er nýtt met, og 155 fleiri bilar um dagin samanborið við í juni, tá ið met seinast varð sett. Tá koyrdu 5.262 akfør gjøgnum tunnilin.
September hevur annars verið ein góður mánaður hjá tunnilsfelagnum, tí eisini í fjør var september besti mánaður í Eysturoyartunlinum, tá ið hugsað verður um mestu ferðsluna.
Miðalferðslan er vaksin munandi hetta árið. Í september í ár koyrdu nevniliga 644 fleiri bilar gjøgnum tunnilin samanborið við í fjør.
Eisini nógv ferðsla í Norðoyatunlinum og Vágatunlinum
September var eisini góður í Norðoyatunlinum og Vágatunlinum, tí í báðum tunlunum var ferðslan í september í ár størri enn í september í fjør. Talan var tó í hvørgum føri um met.
Í Vágatunlinum er mest ferðsla í mai, juni, juli og august. September er á fimta plássi við 2.984 bilum.
Í Norðoyatunlinum er september næstbesti mánaður í ár. Bara august hevur verið betri, tá ið talan er um mest ferðslu. Í september koyrdu 4.326 bilar gjøgnum tunnilin.