600 fólk deyð í vatnflóð í Nigeria

Meira enn 600 fólk í Nigeria eru síðani summar deyð í ringastu vatnflóðini í tíggju ár.

Tað siga nigerianskir myndugleikar, sum Ritzau og AFP endurgeva.

Samstundis hevur vatnflóðin eisini noytt meira enn 1,3 milliónir fólk í Nigeria at rýma frá húsi og heimi.

Vatnflóðin hevur eisini oyðilagt meira enn 82.000 hús og umleið 111.000 hektarar av dyrkaðum lendi.

Vandi fyri hungursneyð

Regntíðin í Nigeria byrjar vanliga í juni, men í ár hevur regnað serliga illa síðani august, siga tilbúgvingarmyndugleikarnir.

Í 2012 doyðu 363 fólk av vatnflóð í Nigeria, meðan 2,1 millión fólk vórðu noydd at flýggja heimanífrá.

Sameindu Tjóðir søgdu í september, at Nigeria er eitt av seks londum í heiminum, sum er í serliga stórum vanda fyri at enda í hungursneyð.