9.000 russiskir hermenn á veg til Hvítarusslands

9.000 russiskir hermenn eru nú á veg til Hvítarusslands.

Tað skrivar verjumálaráðið í Minsk í Hvítarusslandi, sum Reuters endurgevur.

Herdeildirnar skulu vera partur av felags russisku-hvítarussisku hereindunum, sum skulu verja markið  fyri "hóttanum úr Ukraina og Vesturheiminum", sum Aleksandr Lukasjenko, forseti í Hvítarusslandi, málber seg.

Avgerðin at loyva russiskum herdeildum við markið í Hvítarusslandi kann vera sera vandamikil hjá Lukasjenko, tí flestu fólk í Hvítarusslandi stuðla ikki krígnum í Ukraina. Vandi er tí fyri, at fólkið kann venda sær móti forsetanum.

Vil varðveita valdið

Hinvegin hevur Aleksandr Lukasjenko tørv á russiskum stuðli fyri at vera sitandi við valdinum, og tí kann hann ikki veruliga siga nei til Putin.
 
Flemming Splidsboel, granskari og serfrøðingur í russiskum trygdarviðurskiftum, sigur, at Lukasjenko er undir sera stórum trýsti og hevur verið tað síðani forsetavalið í 2020.

Hann vísir á, at hetta er kostnaðurin, Lukasjenko má rinda fyri at fáa russiskan stuðul. Og fær hann ikki stuðul haðani, so verður hann tveittur úr forsetabústaðnum, sigur Flemming Splidsboel.

Fleiri ES-lond viðurkenna ikki Lukasjenko sum lógligan forseta í Hvítarusslandi. Tað er við náði frá Russlandi, at hann hevur sitið við valdið síðani valið í 2020.