Stuðla almennum reiðaríi - prísurin á gerandisvørum lækkar

Almenna grønlendska reiðaríið Royal Artic Line - RAL - lækkar orkuavgjaldið, sum hevur verið kravt, síðani oljuprísirnir fóru at hækka av álvara.

Grønlendska landsstýrið hevur sett 30 milliónir krónur av, sum hava við sær, at avgjøldini, ið hava ligið um 30 prosent í miðal fyri ymsu farmabólkarnar, lækka munandi.

Fyri frystar vørur, ið verða sigldar úr Danmark til Grønlands, verður nú einki avgjald kravt frá RAL.

Gerandisvørur longu lækkaðar í prísi

Fyri alt annað góðs hesa farleið verða kravd 14 prosent í orkuavgjaldi fyri góðs úr Grønlandi til meginlandið, og fyri góðs, ið verður siglt millum býir og bygdir í Grønlandi, verða kravd 20,2 prosent.  

Hesi avgjøld verða fastfryst til 31. desember, skrivar grønlendski tíðindamiðilin, Sermitsiaq.

Fleiri handilsfeløg - millum annað KNI - hava boðað frá, at nógvar gerandisvørur longu eru lækkaðar í prísi, nú tað frættist, at landsstýrið vildi stuðla farmaprísinum.