SAS fær eykarokning fyri brennievni

Skandinaviska flogfelagið SAS hevur fingið eina stóra eykarokning fyri brennievni, tí kursurin á amerikanska dollaranum er hækkaður.

Útreiðslurnar til brennievni, sum er vorðið nógv dýrari, eru meira enn eina milliard krónur.

Tað metir Jacob Pedersen, greinari hjá Sydbank, í samrøðu við check-in.dk, sum DR endurgevur.

Orsøkin til øktu útreiðslurnar er, at SAS - sum so nógv onnur flogfeløg - rindar brennievni og leiguavtalur í dollarum.

Prísirnir hækka

Dollarin hevur ikki verið so sterkur, sum hann er nú, síðani 2002, og tað ger ilt verri hjá skandinaviska flogfelagnum.

- Hetta er tann ringast hugsandi støðan fyri SAS. Avleiðingin verður, at prísirnir fara at hækka, sigur greinarin við check-in.dk.

SAS, sum er hart spert fíggjarliga, kunngjørdi í fjør eina bjargingarætlan, sum nevnist "SAS Forward".

Endamálið við teirri avtaluni er at seta sparingar í verk fyri 5,3 milliardir krónur.