USA letur Grønlandi meiri pening

USA fer at lata Grønlandi 1,5 milliónir dollarar, ella umleið 11,4 milliónir krónur í okkara peningi, til at menna landið.

Tað upplýsir grønlendska landsstýrið í einum tíðindaskrivi í dag.

Hetta er triðja ferðin í hálvt triðja ár, at USA letur pening til menning í Grønlandi.

Í apríl 2020 játtaði amerikanska stjórnin 83 milliónir kr. til ymsar verkætlanir, sum skulu styrkja samstarvið millum Grønland og USA.

160 mió. kr. tilsamans

Í juli í fjør játtaði USA 65 milliónir kr. aftrat, og sostatt hevur amerikanska stjórnin latið Grønlandi tilsamans góðar 160 milliónir krónur av amerikansku játtanini til menningarverkætlanir uttanlands.

Seinasta upphæddin, sum er 11,4 milliónir kr., verður játtað, eftir at stjórnarumboð fyri Grønland, USA og Danmark høvdu fund í statinum Maine í USA í gjár.

Umboðini fyri londini viðgjørdu møguleikarnar at bøta og tryggja handilssambandið millum Grønland og USA, m.a. við veitingartrygd, nú kríggj er í Ukraina.