Umskipað sjúklingaráð hevur nú fimm limir

Kaj Leo Holm Johannesen, landsstýrismaður í heilsumálum, hevur sett nýtt sjúklingaráð, eftir at Sjúklingaráðið er umskipað, og virksemið hjá ráðnum er dagført

Í Sjúklingaráðnum eru Jákup N. Olsen, sum Krabbameinsfelagið tilnevndi, Hilmar Augustinussen í Alzheimerfelagnum, Emil Michelsen í Heilafelagnum og Poula Reinert Olsen í CP Føroyum.

MEGD tilnevndi hesi trý. Og Giktafelagið og MEGD tilnevndu Hergerð Joensen.

Jákup N. Olsen og Emil Michelsen vóru eisini í fráfarna Sjúklingaráði.

Skipar seg sjálvt

Sjúklingaráðið skipar seg sjálvt við formanni, næstformanni og skrivara. 

Sjúklingafeløg, sum umboða sjúklingar, sum vanliga verða viðgjørdir á sjúkrahúsunum, tilnevna fólk í Sjúklingaráðið. 

Heilsumálaráðið eftirmetti í 2020 Sjúklingaráðið. Mælt var til at umskipa ráðið.

Limatalið er farið úr níggju niður í fimm.

Ráðgeva landsstýrisfólkum

Uppgávur og ábyrgdir hjá Sjúklingaráðnum eru at ráðgeva landsstýrisfólkinum um uppskot um lógir og kunngerðir, sum hava týdning fyri veitingar til sjúklingar.

Ráðið skal eisini viðgera yvirskipað viðurskifti, sum hava týdning fyri veitingar til sjúklingar. 

Sjúklingaráðið skal gera hoyringarskriv, vera við í arbeiðsbólkum og hava fastar árligar fundir við landsstýrisfólkið.

Sjúklingaráðið verður valt eftir hvørt løgtingsval.