Fyrsta fetið ímóti HM-undankapping skal takast í kvøld

Í kvøld skal føroyska hondbóltslandsliðið við kvinnum spæla fyrsta dystin í royndini at koma í HM-undankappingina.

Talan er um fyrra play-off dystin ímóti Kosovo, sum byrjar klokkan 18.30. 

Seinni dysturin verður leygardagin.

Formliga hava Føroyar heimavøll í kvøld, men báðir dystirnir verða spældir í Istog í Kosovo.

Nýtt play-off umfar upp á spæl

Verða Føroyar omaná samanlagt eftir dystirnar ímóti Kosovo, skal nýtt play-off umfar spælast ímóti landi, sum er hægri styrkismett. Hesir dystir verða spældir í apríl næsta ár.

Føroyar spældu tveir venjingardystir ímóti Íslandi sum liður í fyrireikingini til play-off dystirnar ímóti Kosovo. Teir endaðu báðir við fimm máls tapi. 

Turið Arge Samuelsen, sum telist millum royndastu spælararnar á liðnum, er ikki við til dystirnar ímóti Kosovo.