Løgmaður koyrt Jenis av Rana frá

Løgmaður hevur í dag gjørt av at koyra Jenis av Rana, landsstýrismann í uttanríkis- og mentamálum, úr starvi, sbr. stýrisskipanarlógini § 29 stk. 2.

Tað boðar Bárður á Steig Nielsen frá í tíðindaskrivi fyri løtu síðani.

Løgmaður sigur í stuttari viðmerking, at:

“Síðani eg tók við sum løgmaður, havi eg roynt at vera savnandi, diplomatiskur og rúmligur. Men samstundis má eg ásanna, at landsstýrismaðurin í uttanríkis- og mentamálum yvir eitt longri tíðarskeið hevur bjóðað hesum av. Tá landsstýrismaðurin so í gjár alment heitir á onnur landsstýrisfólk um beinleiðis at ganga í móti boðum løgmans, ja, tá røkkur mín rúmligheit ikki longur.

Løgmaður røkir fyribils uttanríkis- og mentamál, stendur í tíðindaskrivinum frá Bárði á Steig Nielsen.

Eykatíðindasending verður í útvarpinum klokkan 11.