Útflutningurin til Russlands var 37 milliónir í september

Føroyar útfluttu fyri 36,6 milliónir krónur til Russlands í september.

Talan er um olju og aðrar vørur til russisk skip, sum eru í Føroyum.

Annars útfluttu Føroyar fyri 9,1 milliard krónur fyrstu tríggjar ársfjórðingar í ár. Vøksturin sammett við somu tíð í fjør er 33 prosent.

Innflutningurin var 200 milliónir størri í ár.

Fiskavøruútflutningurin er vaksin til flestu marknaðir.

Og summir marknaðir eru at kalla nýggir, so sum Baltalondini og Ísrael, sum keypa laks úr Føroyum.

Laksur var útfluttur fyri fýra milliardir fyrstu tríggjar ársfjórðingar í ár, fyri ein triðing meira enn í fjør.