Bjarni og Bárður royna aftur at ávirka samgonguna

Samgongutingmenninir Bárður á Steig Nielsen í Sambandsflokkinum og Bjarni Djurholm í Fólkaflokkinum gjørdu mikudagin enn eina roynd at fáa samgonguna at venda privatu tunnilsloysnini hjá Kára P. Højgaard, landsstýrismanni, bakið.

Teir sendu tá floksfeløgum sínum uppskotið um almenna loysn eina ferð afturat við áheitan um at viðgera uppskotið og leggja tað ella okkurt, sum líkist tí, fyri løgtingið.

Alment felag

Bjarni Djurholm og Bárður á Steig Nielsen skjóta upp at stovna eitt alment tunnilsfelag við einum kapitali upp á eina hálva milliard krónur, at lata allar undirsjóvartunlarnar í hetta nýggja felagið og at lata tí felagum upp í hendur at byggja bæði Eysturoyartunnilin og Sandoyartunnilin.

Vágatunnilin og Norðoyatunnilin skulu, sambært uppskotinum, ikki í nýggja felagið fyri at bummgjøldini í teimum báðum tunlunum skulu fíggja íløgurnar í nýggju tunlarnar.

Brúka frívirðið at læna fyri

Frívirðið í Vágatunlinum og Norðoyatunlinum skal brúkast til at fáa bíligari lán til nýggju tunlarnar, siga teir báðir samgongutingmenninir.

Uppskotið hjá teimum er ikki lagt fyri tingið. Tað er tí ikki við, nú Rættarnevndin viðger tunlarnar.