Bara átta prosent nøgd við kynsbýtið í landsstýrinum

Bara átta prosent eru nøgd við kynsbýtið í fráfarandi landsstýri.

81 prosent eru ikki nøgd.

Gallup Føroyar hevur gjørt eina kanning fyri Demokratia um kynsbýti í politikki.

Í Norðstreymoy er ónøgdin størst, 87 prosent. Hon er minst í Eysturoynni, 78 prosent.

Kynsbýtið í løgtinginum

Spurt var eisini um kynsbýtið í løgtinginum.

76 prosent av kvinnunum og 56 prosent av monnunum svaraðu, at kynsbýtið í fráfarandi løgtingi er ikki í lagi.

Kanningin sigur, at javnstøða hevur stóran týdning hjá veljarum. 81 prosent eru fyri javnstøðu í politikkinum, bara sjey prosent taka ikki undir við javnstøðu. 

Undirtøkan er størst í Vágum, 92 prosent, og minst í Sandoynni, 68 prosent.

valplakatir, Løgtingsvalið 2022, 16:9

(Mynd: Bjarni Árting Rubeksen)

Velja fleiri menn

Hóast fólk yvirhøvur vilja hava javnstøðu, velja fleiri menn enn kvinnur. 24 prosent av teimum, sum vóru spurd, siga seg ætla at velja eina kvinnu í morgin. 31 prosent velja ein mann.

44 prosent høvdu ikki avgjørt, um tey fara at velja eina kvinnu ella ein mann. 

Gallup-kanningin var gjørd frá 12 til 18. november. 528 fólk vóru spurd.